Jaa halloo, oos se joulupukki? No niin, Huuvan Aatu täältä Haaparannalta hei. Saiskos joulutontulta toivoa semmosia oikein utopistisia jouluklappia? Mie tiän, mie tiän, että mie olen vähän myöhäin liikheelä, niin ja kläpilehän net oon enämpi net resäntit, eikö vain, mutta jo’, jo… noh..no niin.. Ja! Saapii! Noh, noh, no mie mie toivosin, joulu-, tai sitte vaikka uueksi vueksi, jos oon vaikea totteuttaa toivomusta näin kiihreelä, että, kuunteleppa nytte, että Suomi ja Ruotti tämän merkki- eli suruvuen 2009 kunniaksi päättäsivä korjata sen onnettomuuen, mikä sattu kohta 200 vuotta sitte ko Suomi menetti Ruottin ja Ruotti Suomen. Laitama hyntyt yhtheen ja pyyhimä pyyhekumila pois tämä riethaan raja tästä. Ja mitäs met kahela pääkaupungila, ko Tornio olis tässä just hy’älä paikala perämeren pohjukassa, uuen Ruotti-Suomi-neijon ei navassa, mutta reisien välissä.
- Täh, mitä? Että kohtuuton toive? - No mutta kuule, kuule vielä, tekisimmä siittä uuesta maasta Suomen kielilain mukhaan viralisesti kakskielisen. Niin, ko soon pukki sillä laila, että Ruottissa oon suunnilheen saman verran ruottinsuomalaisia ressukoita, ko mitä Suomessa oon niitä suomenruottalaisia reppanoita.
Niin ja Haaparanta liitethäis Tornihoon, tietekki… Mie unohin sen sanoa, hopussa, niin ko mie olen niin hopussa, ja ko soon niin kaikki selvää pässinlihhaa omassa päässä. Ei Haaparantaa nimenä tartte sen enämpää ko, että se kertoo missä kaupungisosassa liikuthaan, eli Suensaarela vai Haaparannala. Eli Swensarölä vai Haparandassa ruottiksi. Tai Salmela, tai Miukissa, noh jokos sie ymmärrät? Ja kylilä olis sitte samat nimet väylän kahta puolta, niinko ylempänäki, Tornio, Ylitornio… no kyllä sie ymmärrät. Ja kaks sattaa vuotta jakkautunu Alatornion seurakuntaki vois taas yhtyä. Halleluuja! Eiks sie näe kunka hyä juttu tämä oon?! Nehän olit seurakunnakki ennen vanhaan, niinko kyläkki, väylän yli, että kirkko yhelä puolela ja Tuonela, eiko hautausmaa toisela.
No niin. Ja samala, ko Tornio vaurastuis ja kasvais, niin nuot kahen saan vuen takasen soan jälkheiset luonottomat syöpäkasvaimet Oulu ja Luulaja saisit näivettyä sopevamman kokosiksi. Eihään net ole luonolisia kaupunkia, ko net oon nousseet hithaasti tämän viimisen kahen saan vuen aikana. Aivanko syöpä, turvaettäisyyelä rajasta molemin puolin, kuitenki sinne haikailen. En mie ole koskhaan pitäny luonolisena käyä soppailemassa Luulajassa tai Oulussakhaan ko met olema oikeasti maailmankaikkeuen napa… niin vai oliko se kohtu. Mie muistan, että pani vasthaan lähteä lukehmaan Luulahjaan silloin ko oli se aika. Tottuushan oon se, että met olema meän maailman luonolinen keskipiste.
Niin en mie muuta toivo joulu’.. niih, häh, mitä? Mitä ei? Valtuuksia? Jaaa… Nooh varatoivomuksena mie halvaisin semmosen sisäkäyttösen digiantennin ko vuokranantaja ei ole välittäny tavalista antennia laittaa katole, ja kaapelista puuttu joku Suomen kanava. Jääpii Pik Braterit näkemättä… Niin ja näin joulun kunniaksi pullo punasta olis aivan soma olla, sitä Hessun meile valuttammaa verta.. niin niin ei jouluna ko sitte pääsiäisenä kyllä mie tiän joo joo. Heei, mutta kuule jos mie panisin käet risthiin ja pirhauttasin sille, oliskhaan sillä valtuuksia? -No mie pruuan, joo, hyyä joulua, hei!